IX CAMPEONATO CIDADE DE OURENSE
 |
| Hernan segundo en Ourense |
En Ourense non houbo sorpresas e foron os grandes favoritos nas dúas categorías os que finalmente se alzaron co trofeo: Diego Mahía e Víctor Bouza no apartado masculino e Patricia Calvo e Mayra Vásquez, vencedoras da primeira proba celebrada en Vigo, no apartado feminino.
O sábado a proba arrincou co torneo masculino, no que participaron un total de dezasete parellas. Nesta categoría a parella formada por Víctor Bouza e Diego Mahía amosou o seu dominio, con catro vitorias asinadas en dous sets, incluidas as eliminatorias nas que se desfixeron sen problemas en semifinais de Antón De Valenzuela e Borja Covelo (21-11/21-6) e superaron con solvencia na final a Hernán Tovar (COVP) e Pablo Gómez (VPV) (21-15/21-12).
O bronce da proba caeu en mans da dupla do Volei Praia Vigo, De Valenzuela-Covelo, que venceu nun pulso a un set a Fernando D. Guiñazu e Emilio J. Núñez, do Ourense Volei Praia (21-15).
 |
| Pachi segunda en Ourense. |
O domingo foi a quenda da categoría feminina, na que a parella formada por Patricia Calvo e Mayra Vasquez subían por segunda vez consecutiva ao máis alto do podio. As xogadoras do clube madrileño Majadahonda dominaron a proba, gañando todos os seus partidos en dous parciais. Pasaron máis apuros nos inicios da semifinal na que se enfrentaron ás xogadoras do CI Zalaeta Sofía Hidalgo e Patricia Suárez, pero tras un igualado primeiro set que rebasou os 21 tantos (22-20), as da capital meteron a directa cara a final cun contundente 21-13 no segundo.
Na final, Patricia e Mayra atoparíanse con Luci Paz (VPV) e Patricia Vázquez (COVP), que a súa vez superaran nas eliminatorias á parella do Volei Praia Vigo formada por Rebeca Hernández e Ania González, nun partido especialmente intenso que chegou ao tie break (2-1: 21-14/18-21/15-11).
Na loita polo trofeo, o equipo formado por Calvo-Vásquez mostrouse imparable no primeiro parcial, deixando ás súas rivais en sete puntos, e a pesar da reacción de Pachi e Luci no seguinte xogo, as galegas non puideron evitar a vitoria do conxunto madrileño, que sentenciou 19 a 21.
Ás finalistas acompañáronas no podio Patricia Suárez e Sofía Hidalgo, que venceron na final de consolación a González-Hernández..
Fuente: FGVB.
